ഇലവീഴാപൂഞ്ചിറയിൽ സുരക്ഷ നിയന്ത്രണവും അടിസ്ഥാന സൗകര്യ വികസനവും ഉടൻ നടപ്പിലാക്കും - ജില്ലാ കളക്ടർ

Yes Vartha Editor March 02, 2025

കോട്ടയം ജില്ലയിലെ പ്രധാനപ്പെട്ട ടൂറിസ്റ്റ് കേന്ദ്രമായ ഇലവീഴാപൂഞ്ചിറയിൽ എത്തുന്ന വിനോദസഞ്ചാരികളുടെ വർദ്ധനവ് കണക്കിലെടുത്ത് സുരക്ഷ നിയന്ത്രണവും അടിസ്ഥാന സൗകര്യവികസനവും വളരെ അടിയന്തരമായി നടപ്പിലാക്കുമെന്ന് ഇലവീഴാപൂഞ്ചിറ സന്ദർശിച്ച കോട്ടയം ജില്ലാ കളക്ട്ർ ജോൺ വി.സാമുവേൽ അറിയിച്ചു.

മേലുകാവ് ഗ്രാമപഞ്ചായത്തിൻ്റെയും ഡി.റ്റി.പി.സിയുടെയും സംയുക്ത മേൽനോട്ടത്തിൽ ഇലവീഴാപൂഞ്ചിറയിലെ സുരക്ഷ നിയന്ത്രണവും അടിസ്ഥാന സൗകര്യ വികസനവും മാലിന്യ സംസ്കരണവും നടപ്പിലാക്കുവാനാണ് കളക്ടറുടെ തീരുമാനം.ഇലവീഴാപൂഞ്ചിറയിൽ എത്തുന്ന വിനോദ സഞ്ചാരികളുടെ വാഹനങ്ങൾക്ക് ബി.എസ്.എൻ. എൽ ടവർ ഭാഗത്ത് പാർക്കിംഗ് സൗകര്യങ്ങൾ ഏർപ്പെടുത്തും.

ഇലവീഴാപൂഞ്ചിറയിലെ വിവിധ ടൂറിസം പോയിൻ്റുകളിൽ വിശ്രമകേന്ദ്രങ്ങൾ നിർമ്മിക്കും. ദിശാബോർഡുകൾ സ്ഥാപിക്കും.

പോലീസ് എയ്ഡ് പോസ്റ്റ്, ടൂറിസം ഇൻഫർമേഷൻ സെൻ്റർ, അമെനറ്റി സെൻ്ററുകൾ സ്ഥാപിക്കും.ഇലവീഴാപൂഞ്ചിറ ടൂറിസം വികസനം നടപ്പിലാക്കുന്നതിനായി മേലുകാവ് ഗ്രാമപഞ്ചായത്തും ഡി.റ്റി.പി.സിയും സംയുക്തമായിട്ട് ഡി.പി.ആർ തയ്യറാക്കുന്നതിനായി കോട്ടയം ജില്ലാ നിർമ്മിതികേന്ദ്രത്തെ ചുമതലപ്പെടുത്തി നടപടികൾ ആരംഭിച്ചു.

ജില്ലാ കളക്ടറോടൊപ്പം ഈരാറ്റുപേട്ട ബ്ലോക്ക് പഞ്ചായത്ത് പ്രസിഡൻ്റ് മറിയാമ്മ ഫെർണാണ്ടസ്, മേലുകാവ് ഗ്രാമപഞ്ചായത്ത് പ്രസിഡൻ്റ് ജോസുക്കുട്ടി ജോസഫ്, വൈസ് പ്രസിഡൻ്റ് ഷൈനി ജോസ്,ബ്ലോക്ക് മെംബർ ജെറ്റോ ജോസ്, ഇലവീഴാപൂഞ്ചിറ വാർഡ് മെംബർ ഷീബാമോൾ ജോസഫ്, പഞ്ചായത്ത് മെംബർമാരായ പ്രസന്ന സോമൻ, അനുരാഗ് കെ.ആർ, ഡി.റ്റി.പി.സി സെക്രട്ടറി ആതിര സണ്ണി,

കോട്ടയം ജില്ലാ നിർമ്മിതികേന്ദ്രം അസി. എജിനിയർ അനിൽകുമാർ പി.കെ, മീനച്ചിൽ തഹസിൽദാർ ലിറ്റി മോൾ തോമസ്, ഡെപ്യൂട്ടി തഹസിൽദാർ അനൂപ് പുരുഷോത്തമൻ ,മേലുകാവ് വില്ലേജ് ഓഫീസർ സജി മാത്യൂ, സ്പെഷ്യൽ വില്ലേജ് ഓഫീസർ സാം, പഞ്ചായത്ത് അസി.സെക്രട്ടറി പോൾ ബേബി സാമുവേൽ,ഇലവീഴാപൂഞ്ചിറ ടൂറിസം വികസന സമിതി സെക്രട്ടറി അനിൽ പി.എസ് പൊട്ടം മുണ്ടയ്ക്കൽ, ആർ.ആർ.റ്റി അംഗം ഫ്ലോറൻസ് ബിനു എന്നിവർ പങ്കെടുത്തു.