പാലാ രൂപത കുടുംബ കൂട്ടായ്മ വാർഷികം നടത്തി

പാലാ രൂപതാ പ്ലാറ്റിനം ജൂബിലി ആഘോഷത്തിന്റെ ഭാഗമായി രൂപതാ കുടുംബ കൂട്ടായ്മ വാർഷികം സംഘടിപ്പിച്ചു. ളാലം സെൻ്റ് മേരീസ് പഴയ പള്ളി ഹാളിൽ നടത്തിയ സമ്മേളനം പാലാ രൂപതാധ്യക്ഷൻ അഭിവന്ദ്യ മാർ ജോസഫ് കല്ലറങ്ങാട്ട് പിതാവ് ഉദ്ഘാടനം ചെയ്തു.

സഭയുടെ ഭാവിയും നാളത്തെ സഭയും കുടുംബ കൂട്ടായ്മയുടെ കൈകളിലാണ്. കുടുംബ കൂട്ടായ്മ ഒരു അച്ചു പോലെയാണ്. കുടുംബമാകുന്ന അച്ചുകൂടത്തിലാണ് നമ്മുടെ കുഞ്ഞുങ്ങൾ വളരേണ്ടത്. ദൈവവചനങ്ങളെ ക്കുറിച്ചും സഭയുടെ പ്രബോധനങ്ങളെ കുറിച്ചും കൂട്ടായ്മയെ കുറിച്ചുമെല്ലാം ആവശ്യമായിരിക്കുന്ന കാലഘട്ടത്തിലാണ് നാം ജീവിക്കുന്നത് നമ്മുക്ക് നഷ്ടപ്പെട്ടു പോയ ക്രിസ്തീയ പ്രബോധനം കുടുംബകൂട്ടായ്മകൾ വഴി തിരിച്ചു കൊണ്ടുവരാനാകണം.

അച്ചടക്കം കുടുംബത്തിലും ഇടവകയിലും സഭയിലും ഉണ്ടായാൽ മാത്രമെ സഭയും കുടുംബവും വളരുകയുള്ളൂ. കുടുംബ കൂട്ടായ്മ സഭയുടെ പ്രതിരോധ ശക്തിയാണെന്നും സ്നേഹത്തിന്റെ ചങ്ങലയാണെന്നും മാർ ജോസഫ് കല്ലറങ്ങാട്ട് പറഞ്ഞു.

ബൈബിൾ പ്രതിഷ്ഠ കുടുംബ കൂട്ടായ്മ ഡയറക്ടർ ഫാ. ജേക്കബ് വെള്ളമരുതുങ്കൽ നിർവഹിച്ചു. രൂപത പ്രസിഡൻ്റ് സെബാസ്റ്റ്യൻ ജോസഫ് പയ്യാനിമണ്ഡപത്തിൽ അദ്ധ്യക്ഷത വഹിച്ചു. അസി. ഡയറക്ടർ ഫാ. ആൽബിൻ പുതുപ്പറമ്പിൽ സ്വാഗതം ആശംസിച്ചു. വികാരി ജനറൽ മോൺ. സെബാസ്റ്റ്യൻ വേത്താനത്ത് അനുഗ്രഹ പ്രഭാഷണം നടത്തി. ളാലം പഴയപള്ളി വികാരി ഫാ. ജോസഫ് തടത്തിൽ, സിന്ധു ഷാജി ഇടയാനിക്കാട്ട് എന്നിവർ പ്രസംഗിച്ചു. രൂപത സെക്രട്ടറി ബാബു പോൾ പെരിയപ്പുറം റിപ്പോർട്ട് അവതരിപ്പിച്ചു. രൂപതയിലെ 171 ഇടവകകളിൽ നിന്നും പ്രതിനിധികൾ പങ്കെടുത്തു.

ഏറ്റവും മികച്ച പ്രവർത്തനം നടത്തിയ കുടുംബ കൂട്ടായ്മകൾക്കുള്ള ഇടവക, ഫൊറോന തല ട്രോഫികൾ മാർ ജോസഫ് കല്ലറങ്ങാട്ട് വിതരണം ചെയ്തു. ഏ വിഭാഗത്തിൽ ഒന്നാം സ്ഥാനം പയ്യാനിത്തോട്ടം സെന്റ് അൽഫോൻസാ ഇടവകയും ബി വിഭാഗത്തിൽ കാവുംകണ്ടം സെന്റ് മരിയാ ഗോരേത്തി ഇടവകയും സി വിഭാഗത്തിൽ മുട്ടഠ സെന്റ് സെബാസ്റ്റ്യൻസ് ഇടവകയും ഡി വിഭാഗത്തിൽ ഇലഞ്ഞി സെന്റ് പീറ്റേഴ്സ് ആൻഡ് പോൾ ഫൊറോനയും ഒന്നാം സ്ഥാനം കരസ്ഥമാക്കി. രണ്ടാം സ്ഥാനം എ വിഭാഗത്തിൽ മൂന്നാനി സെന്റ് പീറ്റേഴ്സ് പള്ളിയും ബി വിഭാഗത്തിൽ ഉള്ളനാട് സേക്രട്ട് ഹാർട്ട് പള്ളിയും സി വിഭാഗത്തിൽ കുറിച്ചിത്താനം സെന്റ് തോമസ് പള്ളിയും ഡി വിഭാഗത്തിൽ മുട്ടുചിറ ഹോളി ഹോസ്റ്റ് ഫൊറോന പള്ളിയും കരസ്ഥമാക്കി.

മൂന്നാം സ്ഥാനം എ വിഭാഗത്തിൽ ചൂണ്ടച്ചേരി സെന്റ് ജോസഫ് പള്ളിയും ബി വിഭാഗത്തിൽ കുന്നോന്നി സെന്റ് ജോസഫ് പള്ളിയും സി വിഭാഗത്തിൽ കാഞ്ഞിരമറ്റം മാർ സ്ലീവാ പള്ളിയും ഡി വിഭാഗത്തിൽ കുറവിലങ്ങാട് മർത്ത് മറിയം ഫൊറോനയും നേടി.

സമ്പൂർണ്ണ ബൈബിൾ പകർത്തി എഴുതിയ വ്യക്തികളെയും കുടുംബങ്ങളെയും ബൈബിൾ പാരായണം നടത്തിക്കൊണ്ടിരിക്കുന്ന ഇടവകകളെയുംചടങ്ങിൽ ആദരിച്ചു.

പാലാ രൂപത 75 വർഷം പൂർത്തിയാക്കിയതിന്റെ പ്രതീകമായി 75 വയസ് തികഞ്ഞ മുൻ രൂപത പ്രസിഡന്റ് തോമസ് വടക്കന് മെമെന്റോയും സമ്മാനിച്ചു.